Tónlistarmaðurinn Gunnar Marís Straumland Ólafsson, oftast kallaður Gunnar Marís eða G. Marís, er látinn langt fyrir aldur fram. Hann hefði orðið 36 ára í haust. Vinir og ættingjar minnast hans á samfélagasmiðlum.
Hann var virtur innan rappssenu Íslands, enda með langan feril að baki innan hennar. Hann sigraði rappkeppnina Rímnaflæði árið 2003, sama ár og Mc Gauti, Gauti Þeyr Másson, var valinn efnilegasti rapparinn.
Í seinni tíð er hann líklega þekktastur fyrir tónlistarsamstarf með rapparanum Didda Fel. Þeir gáfu saman út plötuna Hvernig rúllar þú? árið 2007 og Gunnar átti sterka innkomu á sólóplötu Didda frá árinu 2010, Hesthúsið.
Tónlistarmaðurinn Logi Pedro Stefánsson minnist Gunnars á Twitter og deilir lagi af þeirri plötu. Hann skrifar:
„Gunni Marís fallinn frá. Var mjög hæfileikaríkur maður. Hér er frábært lag sem hann var á af plötunni Hesthúsið, með Didda Fel.
Þeir sem þekkja íslenskt rapp, og sögu ísl rapp, þekkja og þekktu Marís.
Hvíl í friði, samúðarkveðjur til vina og fjölskyldu“