Íþróttafréttamaðurinn og ljósmyndarinn Gunnlaugur Rögnvaldsson er látinn, hann var 62 ára gamall. Mbl.is greindi frá þessu.
Gunnlaugur fæddist í Reykjavík árið 1961 og ólst upp í Vesturbænum þar sem hann gekk í Melaskóla og síðar Hagaskóla. Hann æfði knattspyrnu með KR og var virkur í skátafélaginu Ægisbúum.
Gunnlaugar var mikill áhugamaður um akstur og íþróttir tengdar þeim en hann keppti í rallakstri og torfæru á bæði á Íslandi og erlendis. Þekktastur er hann þó fyrir að vera brautryðjandi í íþróttaumfjöllun um akstursíþróttir á Íslandi og þá sérstaklega Formúlu eitt. Gunnlaugur var umsjónarmaður og lýsandi Formúlu eitt hérlendis frá árinu 1997 og hlaut mikið lof fyrir fagmennsku sína á því sviði og tók hann viðtöl við öll stærstu nöfn sem tengjast þeirri íþrótt, allt frá ökumönnum yfir í keppisstjóra.