Ísland gerði 1-1 jafntefli við Lúxemborg.
Íslenska karlalandsliðið í fótbolta gerði 1-1 jafntefli við Lúxemborg fyrr í kvöld. Íslenska landsliðið stóð sig mjög vel í fyrri hálfleik og skoraði Orri Steinn Óskarsson sitt fyrsta landsliðsmark á 23. mínútu leiksins. Í upphafi seinni hálfleiks jafnaði Lúxemborg hins vegar leikinn eftir að íslenska landsliðið virtist ekki hafa áttað sig á því að seinni hálfleikur væri hafinn. Eftir markið missti íslenska liðið hausinn talsvert og varð spilamennska liðsins mun verri en í fyrri hálfleik. Liðið náði þó að skapa sér nokkur færi í seinni hálfleik en náði ekki að nýta þau.
Stóra stund leiksins kom þó á 70. mínútu þegar Gylfi Þór Sigurðsson kom inn á leikvöllinn en var þetta fyrsti landsleikur Gylfa síðan 2020. Gylfi var handtekinn árið 2021 og sakaður um að hafa brotið gegn barni. Eftir rannsókn sem tók tæp tvö ár var málið látið niður falla af bresku lögreglunni. Rúmlega 4500 manns fögnuðu þónokkuð hærra þegar Gylfi kom inn á en þegar Ísland skoraði markið sitt.