Hannes Hólmsteinn Gissurarson varar við netmiðlum í nýrri færslu á Facebook.
Prófessorinn á eftirlaunum, Hannes Hólmsteinn Gissurarson hefur verið í skotlínunni undanfarið eftir að hann birti færslu sem mörgum fannst löðrandi í kynþáttafordómum en þar sakaði hann múslimska konu um að hafa reynt að stela af honum tösku á Keflavíkurflugvelli. Starfsmaður flugvallarins leiðrétti frásögn Hannesar og benti á óviðeigandi hegðun hans gagnvart barnungum systrum en hún segir að hann hafi meðal annars öskrað á þær að það ætti ekki að hleypa þeim inn í landið.
Í gær birti hann svo ljósmynd frá fjölskylduboði þar sem boðið var upp á pylsu og rauðvín en við ljósmyndina skrifaði hann: „Engir múslimar hér“. Eyddi hann færslunni stuttu síðar, eftir að fjöldi fólks gagnrýndi hann fyrir smekkleysið.
Í morgun skrifaði hann svo færslu þar sem hann segir að menn ættu ekki að taka netmiðlum alvarlega og „gæta sín á að sogast ekki inn í einhver vitleysismál“.
„Netmiðlarnir eru dálítið eins og Bakkus: góður þjónn, en slæmur húsbóndi. Menn eiga að taka hæfilega alvarlega það, sem þar kemur fram (og alls ekki taka það nærri sér), og gæta sín á að sogast ekki inn í einhver vitleysismál.“