Haraldur nokkur, íbúi í Mosfellsbæ, er fjúkandi reiður eftir að hafa næstum orðið tveimur unglingum að bana nýverið sem óku í veg fyrir hann í bænum, nærri skyndibitastaðnum KFC. Óku hin 15 ára ungmenni hjálmlaus á númerslausri vespu á háannatíma í umferðinni.
Haraldur segir frá upplifun sinni í hópi hverfisbúa á Facebook og fullyrðir þar að engu hafi mátt muna að hann dræpi ekki ungmennin. Svona lýsir hann atvikinu:
„Þetta atvikaðist þannig að þessi börn á númerslausri vespu koma inná hringtorgið við KFC. Bruna inná hringtorgið við Vesturlandsveg.skipta um akrein i miðju hringtorgi. Ég er á eftir þeim. Þegar við nálgumst afleggjarann inn völuteig gefur ökumaður stefnuljós til hægri. Fer útí hægri kant eins og hann ætli að stoppa. Þegar ég nálgast og hyggst aka framhjá vinstra megin þá allt í einu beyjir hann til vinstri í veg fyrir mig. Með stefnuljós til hægri. Ég næ sem betur fer að negla niður. Hefði ég verið á ögn meiri ferð hefði ég ekki haft tíma til að stoppa og ekið yfir þau tvö. Ekki spurning um annað,“ segir Haraldur og húðskammar foreldra ungra ökumanna í Mosó.
„Kæru foreldrar sem eigið börn sem ferðast á þessum vespum. Eruð þið til í að hysja upp um ykkur brækurnar, kyngja stoltinu og tala við þau. Brýna ALVARLEGA fyrir þeim að þau eiga ekki að vera í götunum á þessum vespum. Númerslaus. Hjálmlaus. Réttindalaus í umferðinni. Þvers og kruss útum allt. Í veg fyrir bila og allt það. Á götu, uppá gangstétt og allt í hvínandi botni. Ef ég móðga ykkur með að hysja upp um ykkur brækurnar þá verður að hafa það. En orða þetta svona vegna þess að mig langar ekki að aka yfir barn. Það er á ykkar ábyrgð sem foreldrar að ræða við þau. Þetta er tifandi tímasprengja.“
Oddi er afar brugðið við frásögnina og telur nauðsynlegt að grípa strax til aðgerða. „Óþolandi þessir krakkar á vespum. Það ætti að banna vespur,“ segir Oddur ákveðinn.
Birkir er feginn umræðunni. „Vá loks er einhver sem þvorir að segja eh. Þessi blessuðu börn eru oft eða oftast 3 á einu hjóli einn eða engin með hjálm. Hausinn þvolir ekki fallið ef þau bara detta. Tala nú ekki um lenda í árekstri. Tifandi tímasprengja hvenar eitthvað hræðilegt gerist,“ segir Birkir.
Í hverfishópnum er hávær umræða um akstur ungmenna í bænum og Hekla bætir við annarri færslu um sína upplifun:
„Rétt í þessu voru 5 drengir á 2 vespum (2 á annari og 3 á hinni), allir hjálmlausir. Keyrðu út frá blokkunum ská fyrir aftan Barion. Ef einhver kannast við þá endilega ræða við þá. Við verðum öll að reyna stoppa þessa vitleysu.“