Heimilislausum hefur verið gert að yfirgefa gistiskýlin á vegum borgarinnar. Hópur heimilislausra karlmanna sem gist hafa í neyðarskýlinu að Grandagarði hefur neitað að yfirgefa staðinn þar sem úti er blindbylur.
Ragnar Erling Hermannsson hefur birt myndskeið á fésbókarsíðu sinni þar sem hann óskar eftir aðstoð samlanda sinna til að kasta ljósi á raunverulegar aðstæður heimilislausra á Íslandi. „Við krefjumst þess að fá virðingu,“ segir Ragnar Erling í myndskeiðinu.
Á síðu Reykjavíkurborgar um neyðarskýlin segir: „Í Reykjavík eru þrjú neyðarskýli fyrir heimilislaust fólk. Þau eru opin alla daga frá kl. 17:00 til kl. 10:00 næsta dag. Boðið er upp á kvöldverð og morgunmat auk stuðnings og þjónustu frá VoR-teymi og starfsfólki neyðarskýlanna. Ákveðinn fjöldi gistiplássa er í hverju neyðarskýli en engum er vísað frá.“
Mannlíf reyndi að ná sambandi við umrætt gistiskýli en skrifstofan er einungis opin á virkum dögum.
Ragnar Erling var í viðtali við Mannlíf í síðastliðnum mánuði. Viðtalið má lesa hér.