Helga Vala Helgadóttir hvetur ríkisstjórnina til að segja af sér strax.
Lögmaðurinn, leikkonan og fyrrverandi þingkonan Helga Vala Helgadóttir er ekki að skafa af því í nýjustu Facebook-færslu sinni. Þar hvetur hún ríkisstjórn Íslands til að segja af sér strax og segir „endalausar yfirlýsingar“ þar sem illa er talað um samstarfsflokkana, vera óboðlegar.
Hér má lesa færsluna í heild sinni:
„Kæra ríkisstjórn. Þetta er ekki boðlegt ástand. Við getum ekki búið við það að vakna á hverjum morgni með hnút í maganum yfir því hvaða opinbera rifrildi við verðum vitni að milli ráðherra þann daginn. Ef ástandið er orðið svo slæmt að þið getið ekki einu sinni reynt að fela óhjákvæmileg væntanleg stjórnarslit þá sýnið þið þjóðinni þá mannúð/mennsku og mildi að hætta bara núna. Þessar endalausu yfirlýsingar um allt það versta sem ykkur dettur í hug að segja um samstarfsflokkana er bara alls ekki boðlegt.“