Helga Vala Helgadóttir er allt annað en ánægð með að meirihluti fjárlaganefndar Alþingis leggi til að framkvæmdum við byggingum nýs Landsspítala verði frestað.
Lögmaðurinn og fyrrverandi þingmaður Samfylkingarinnar, Helga Vala Helgadóttir segir að með frestun á framkvæmdum við nýjan Landspítala sé verið að „pissa í skóinn okkar allra“ vegna þess að það hafi keðjuverkandi áhrif um allt heilbrigðiskerfið. Í Facebook-færslu sem Helga Vala birti í morgun segir hún ennfremur að frestun sýni „ótrúlega skammsýni“.
Hér má lesa færsluna í heild sinni:
„Það kostar tvisvar til þrisvar sinnum meira að láta eldra fólk, sem ekki getur vegna heilsufars búið heima hjá sér, bíða á hátæknisjúkrahúsinu Landspítala frekar en að leyfa þeim að fara í mannúðlegra umhverfi á hjúkrunarheimilum. Með því að fresta framkvæmdum við nýjan Landspítala er verið að pissa í skóinn okkar allra, því það hefur keðjuverkandi áhrif um allt heilbrigðiskerfið. Með þessu frestast einnig aðrar nauðsynlegar framkvæmdir í heilbrigðiskerfinu, svo sem ákvörðun um nýtingu í Fossvogi, uppbygging hjúkrunarheimila ofl. Við þurfum að klára þetta verkefni sem er löngu komið á tíma og það sýnir ótrúlega skammsýni að fresta þessu enn frekar.“