Katrín Jakobsdóttir forsætisráðherra talaði um það í áramótaávarpi sínu á Rúv að það samfélag sé gott sem styðji við þá sem minna mega sín. Ekki eru allir sammála þeirri staðhæfingu Katrínar að slíkt eigi um íslenskt samfélag.
Gunnar Smári Egilsson, forkólfur Sósíalistaflokks Íslands er einn af þeim sem gagnrýna orð Katrínar. Það gerir hann í nýlegri færslu í Facebook-hóp Sósíalistaflokksins. Ber hann Ísland saman við nágrannalöndin og segir hljóð og mynd ekki fara saman hjá forsætisráðherranum.
„Skrítið þá að stefna að því að bæta hag þeirra mest sem hafa það best og innheimta af þeim lægri skatta en í nokkru nágrannalandi okkar. Og hafa hér veikari barnabótakerfi og verra húsnæðiskerfi en í nokkru landi í nágrenninu, sem grefur undan lífskjörum þeirra sem hafa það verst. Hér fer ekki saman hljóð og mynd, frekar en oftast þegar Katrín forsætis talar,“ skrifaði Gunnar Smári en fjölmargir líkuðu við færsluna.