Lögreglan á höfuðborgarsvæðinu hafði í nægu að snúast laugardagskvöld og aðfararnótt sunnudags.
Laust fyrir klukkan sjö í gærkvöldi kom lögregla ölvuðum manni í austurborginni til aðstoðar. Maðurinn brást illa við aðstoð lögreglu og hrækti hann í andlit lögregluþjóns og sparkaði í annan. Hann var því handtekinn og vistaður í fangageymslu vegna ástands hans og hegðunar. Maðurinn lét mjög ófriðlega í vörslu lögreglu og tókst honum að hrækja í andlit tveggja lögregluþjóna til viðbótar.
Um klukkan fimm í morgun kom lögreglan konu til aðstoðar á Seltjarnarnesi. Konan hafði læst sig inni á baðherbergi og sat þar föst. Lögregla skreið inn um glugga að baðherbergi hennar, og tókst að lyfta henni upp og út um gluggann. Konan var frelsinu fegin, sér í lagi þar sem hún komst tímanlega í flug.
Tilkynning barst um um heimilisofbeldi í Hafnarfirði. Lögregla fór rakleiðis á vettvang og verklag varðandi heimilisofbeldi var þegar í stað virkjað. Málið er nú í rannsókn.
Brotist var inn í grunnskóla í austurborginni um áttaleytið. Lögregla fór á vettvang og er málið í rannsókn.
Lögreglan sinnti einnig fjölda útkalla um allt höfuðborgarsvæðið vegna samkvæmishávaða. Fjórir ökumenn voru stöðvaðir vegna gruns um akstur undir áhrifum fíkniefna, og tveir grunaðir um akstur undir áhrifum áfengis.