Hrafn Jökulsson, hugsjónamaður, rithöfundur og skákfrömuður, greinir frá því á Facebook að Kjartan Björgvinsson og Urður Njarðvík hafi heimsótt hann á Sjúkrahótelið. Þau hófu nýverið rannsókn á starfsemi vöggustofu að Hlíðarenda og Vöggustofu Thorvaldsensfélagsins. Þar voru börn einstæðra, fátækra og veikra mæðra vistuð.
Hrafn segir þetta eina stærstu stund lífs síns. Hann var nýverið greindur með krabbamein á lokastigi. Hrafn skrifar: „ÞAU MUNU LEIÐA SANNLEIKANN Í LJÓS. Ein stærsta stund lífs míns: Kjartan Björgvinsson og Urður Njarðvík eru í rannsóknarnefndinni sem á að fara í saumana á ,,Vöggustofumálinu“. Þau komu að heimsækja mig á Sjúkrahótelið og við áttum mjög merkilega stund saman.“
Hrafn vonast til þess að nú sé loksins kominn tími réttlætis fyrir öll vöggustofubörnin. „Vöggustofumálið snýst um UNGBARNAFANGELSI REYKJAVÍKURBORGAR sem rekin voru 1949-79. Ég var settur á Thorvaldsen 8 mánaða og var þar í 10 vikur. Nú fer í hönd tími RÉTTLÆTIS fyrir vöggustofubörn og alla útburði Íslandssögunnar.“