- Auglýsing -
Nóttin hjá lögreglu var heldur annasöm og gistu alls tíu manns í fangaklefum í nótt. Af þeim tíu voru sex handteknir vegna líkamsárásar og tveir fyrir eignaspjöll. Einn var handtekinn fyrir að trufla störf lögreglu og fara ekki eftir fyrirmælum og annar var gómaður með fíkniefni í fórum sínum.
Seint í nótt var lögregla kölluð út í nokkur skipti í miðbæ Reykjavíkur vegna fólks sem var í annarlegu ástandi. Lögregla kom til aðstoðar og var þeim ekið til síns heima. Þá hringdi íbúi í miðbænum á lögreglu eftir að maður hafði ráfað inn í hús sem hann átti ekki heima í. Lögregla sótti óboðna manninn og skutlaði honum heim. Í Hafnarfirði lá karlmaður út á götu, sá reyndist ofurölvi og var honum einnig ekið heim.