Jón Geir Ágústsson byggingartæknifræðingur og fyrrverandi byggingarfulltrúi á Akureyri er látinn á 90. aldursári.
Jón fæddist 7. ágúst 1935 á Tjörn í Ólafsfirði og lést á Sjúkrahúsinu á Akureyri 10. desember síðastliðinn. Frá þessu segir á fréttavefnum Akureyri.net.
Eiginkona Jóns Geirs var Heiða Þórðardóttir húsmóðir en hún lést árið 2022. Áttu þau börnin Signýju, sjúkraþjálfara, fædd 1958, Þórð, þjónustustjóra á Sólheimum í Grímsnes, fæddur 1959, Margréti, leirlistakonu, fædd 1961, Þórdísi, listakonu, fædd 1964, Maríu Sigríði, listakonu, fædd 1969 og Jóhann Heiðar, hönnunarstjóra CCP, fæddur 1974.
Jón Geir var sonur Margrétar Magnúsdóttur húsmóður og Ágústs Jónssonar byggingameistara. Systkini Jóns voru fjögur talsins en þau voru: Magnús, fæddur 1928, eiginkona hans var Pernille Allette Hoddevik en þau eru bæði látin; María Sigríður, fædd 1929, eiginmaður hennar var Haraldur S. Magnússon en þau eru einnig bæði látin. Yngst kom síðan Halldóra Sesselja sem er gift Hauki Haraldssyni.
Byggingartæknifræðina lærði Jón Geir í Noregi og í kjölfarið starfaði hann allan sinn starfsferil hjá Akureyrarbæ, lengst af sem byggingarfulltrúi. Þá var hann einn af stofnfélögum Myndlistafélags Akureyrar og stundaði hinar ýmsar listgreinar sem, samkvæmt Akureyri.net, veittu honum mikla ánægðju allt til dánardags. Aukreitis teiknaði Jón fjölda húsa á Akureyri, bæði íbúðarhús og opinberar byggingar.
Útför Jóns Geirs fer fram frá Akureyrarkirkju þann 19. desember næstkomandi kl. 13:00