- Auglýsing -
„Ásgeir Jónsson, seðlabankastjóri, vitnar dónalega í tveggja manna tal sem hann átti við háttsettan embættismann, fyrrverandi ríkissáttasemjara, Aðalstein Leifsson.“ Svona hefst færsla samfélagsrýnisins frá Grindavík, Björns Birgissonar en þar talar hann um viðtal sem birtist í Morgunblaðinu, við Seðlabankastjóra.
Í færslunni tekur Björn upp hanskann fyrir verkalýðsleiðtogum og kallar eftir því að Ásgeir verði borinn út úr Seðlabankanum líkt og gert var við Davíð Oddsson eftir hrun.
Restin af færslunni má lesa hér að neðan:
„Hann dylgjar meðal annars um að nafngreindur verkalýðsleiðtogi sé ekki í andlegu jafnvægi.
Hann hreinlega hæðist að þrautreyndum verkalýðsforkólfum sem hafa áralanga reynslu af því að fást við alls kyns fávita á fjármálasviðinu, líka áður en hann sjálfur kom til sögunnar.
Hann leyfist sér að hæðast að fólki í lítillækkunarskyni, fólki sem sér ekki önnur ráð í erfiðri og versnandi stöðu en að mótmæla á Austurvelli.
Þetta er sami maðurinn og hinn virti rithöfundur og fræðimaður Bergsveinn Birgisson sakaði um ritstuld og mér vitanlega hefur sú ásökun ekki verið hrakin, en aðeins mótmælt af veikum mætti frá Svörtuloftum.
Þessi framganga öll er með öllu ólíðandi og ljóst er að eitt af fyrstu verkum nýrrar ríkisstjórnar þarf að vera að bera seðlabankastjóra út úr Seðlabankanum, ekki ósvipað því sem Vinstri stjórnin neyddist til að gera gagnvart Davíð Oddssyni.“