Eins og Mannlíf greindi frá í gær hefur Gylfi Þór Sigurðsson skrifað undir samning við knattspyrnuliðið Val og er sá samningur til tveggja ára og er Gylfi sagður hafa krafist þess að fá tvær milljónir á mánuði.
Gylfi er einn besti knattspyrnumaður í sögu landsins og er markahæsti leikmaður íslenska landsliðsins. Gylfi hefur meðal annars spilað með Tottenham, Everton og Swansea á ferlinum en hann spilaði seinast með danska liðinu Lyngby. Því miður fyrir Gylfa settu meiðsli strik í reikninginn og yfirgaf Gylfi liðið eftir stutt stopp.
Nokkuð ljóst er að mikil pressa verður á liði Vals í sumar en Gylfi er langt frá því að vera eini leikmaðurinn sem hefur gengið til liðs við félagið á undirbúningstímabilinu. Jónatan Ingi Jónsson og Jakob Franz Pálsson hafa ásamt Gylfa snúið heim úr atvinnumennsku og bætast við sterkan leikmannahóp Vals. Margir fótboltaspekingar telja að allt annað en Íslandsmeistaratitill verði vonbrigði fyrir stuðningsmenn Vals. Arnar Grétarsson, þjálfari Vals, tekur undir að það sé mikil pressa á liðinu.
„Pressan minnkar allavegana ekki með komu Gylfa Þórs í leikmannahóp liðsins. En ég hef alveg sagt það, meðal annars þegar að ég kom til félagsins í fyrra, að Valur stæði kannski aðeins aftar en bestu lið deildarinnar. En það er alveg klárt, og var það líka í fyrra miðað við leikmannahóp okkar, að við ætlum að reyna landa öllum þeim titlum sem í boði eru. Það eru ekki óraunhæfar kröfur,“ sagði þjálfarinn í viðtali við Vísi um málið.
Aðrir telja að það sé fáránlegt að afskrifa Víking, sem eru ríkjandi Íslandsmeistarar, enda var liðið í fyrra eitt besta liðið í sögu Íslands. Pablo Punyed, leikmaður Víkings, sagði við Fótbolti.net að liðið stefni að vinna Íslandsmótið aftur.
„Allir byrja á núlli núna. Við ætlum okkur að reyna vinna deildina, ætlum ekki að verja titilinn, heldur vinna hann aftur. Ég myndi segja að það séu 7-8 lið sem geta barist um titilinn núna. Ég myndi halda að deildin verði miklu, miklu þéttari en í fyrra.“