Guðmundur Karl Snæbjörnsson, sérfræðingur í hemilislækningum segir hættulegt að afsala ákvarðanatöku í lýðheilsu til miðstýrðra afla úti í heimi.
Guðmundur Karl, sem er nýjasti gesturinn í podcasti Sölva Tryggvasonar segir að við verðum að gera upp Covid-faraldurinn heildstætt til þess að ákveðnir hlutir endurtaki sig ekki:
„Covid er ekki búið að því marki að blekkingarleikurinn er ekki búinn. Við getum bara farið beint niður á Alþingi og skoðað frumvörp þar sem er í raun verið að afsala löggjöf í þessum málum til miðstýrðra afla úti í heimi. Af því að fólk er orðið þreytt á umræðu um þennan faraldur, þá fer lítið fyrir umræðu um það sem er í gangi núna, þar sem við erum í raun að afsala fullveldi okkar. Stjórnarfrumvarp þar sem ókjörnir fulltrúar úti í heimi eiga að fá að ákveða ákveðna grundvallarhluti þegar kemur að lækningum, heilsu og mikilvægri ákvarðanatöku. Svo eru nýju sóttvarnarlögin annar hlutur sem nánast engin umræða hefur farið fram um í samfélaginu. Ef við ákveðum að láta stofnanir út í heimi taka yfir ákvarðanavald okkar hér á Íslandi verður að fara fram alvöru umræða um það. Ef fólk fær bara að setja atkvæði ofan í pott einu sinni á fjögurra ára fresti og svo er bara fólk úti í heimi að taka risastórar ákvarðanir sem aldrei var kosið af almenningi verðum við að spyrja spurninga. Þetta faraldurstímabil sýndi okkur hluti sem eru ekki eðlilegir og við verðum að gera þetta allt saman upp.”
Guðmundur Karl segir það enga lausn að stinga bara hlutunum ofan í skúffu og hætta að ræða þá. Það að fólki sé stýrt með ótta og enginn megi setja spurningar við línuna sem er lögð sé hættuleg þróun:
„Við megum ekki rækta fokking hræðsluna áfram og bara stinga hlutum endalaust ofan í skúffu. Það verður hægt að stýra okkur að vild ef við látum óttann ráða för. Við höfum þúsundir ára af dæmum um það hvernig valdhafar hafa notað ótta til að stýra fólki. Í gegnum árhundruðin hafa trúarbrögð verið notuð til að ala á ótta og mér finnst þetta faraldurstímabil hafa verið sambærilegt. Þeir sem voguðu sér að setja einhver spurningamerki voru umsvifalaust orðnir villutrúarfólk. Við eigum ekki að hlýða lénsherrunum bara í blindni. Stjórnmálamenn vita ekki allt best og þeir eru oft bara að hugsa um að halda vinnunni og rugga engum bátum. Ég fullyrði að ég hef legið meira yfir gögnum varðandi Covid heldur en allir stjórnmálamenn á Íslandi, landlæknir og sóttvarnarlæknir. Þetta er eflaust allt hið vænsta fólk, en þau eru ekki hafin yfir gagnrýni og það má setja spurningamerki við ákvarðanatökuna.”
Guðmundi er mikið niðri fyrir og hann beygir af þegar hann er spurður hvað hafi fengið hann til að leggja í þennan slag opinberlega:
„Ég lagðist yfir gögnin mjög fljótlega í faraldrinum og fór fljótt að sjá að það væri eitthvað mikið rangt við margt í þessu. Þegar ég sem læknir sé hluti þar sem allt bendir til þess að það sé verið að skaða fólk verð ég að vera heiðarlegur og tjá mig opinberlega. Það sem endanlega fékk mig til þess að fara í það að tjá mig opinberlega um þetta var þegar ég sá fyrstu gögn varðandi barnshafandi konur og bólusetningar. Fór hræðilega í mig að sjá það svart á hvítu og að enginn skyldi ræða um hætturnar sem voru augljósar. Samviska mín leyfði mér ekki að þegja eftir þetta. Mér hefur á ákveðinn hátt verið útskúfað fyrir að þora að tjá mig, en það verður að hafa það. Ég get ekki mokað því sem ég hef séð bara undir teppið og þagað,” segir Guðmundur og heldur áfram:
„Umræða um bólefnin er auðvitað viðkvæm, ekki síst af því að mikill meirihluti fólks lét bólusetja sig. En þegar það átti að fara að bólusetja börn án þess að nein gögn bentu til þess að það væri rétt held ég að margir hafi byrjað að hugsa sig tvisvar um. Lyfjafyrirtækin hafa rakað inn milljörðum ofan í milljarða í hagnað og saga þeirra er ekki alltaf falleg. Við verðum að vera gagnrýnin í hugsun og hlusta á innsæi okkar, en ekki bara hlýða í blindni.”
Guðmundi var hótað fangelsisvist fyrir að skrifa upp á Ivermectin-lyfið í kórónuveirufaraldrinum. Með því vill hann meina að honum hafi verið bannað að lækna fólk á sama tíma og margir kollegar hans hafi fengið milljónir frá lyfjafyrirtækjum.
„Ég er alls ekki að segja að kollegar mínir séu ekki vel meinandi, en þegar menn þiggja milljónir í styrki frá lyfjafyrirtækjum eru þeir einfaldlega ekki óháðir. Fólk sem hefur fengið milljónir í rannsóknarstyrki frá lyfjafyrirtækjum er eðli málsins samkvæmt ekki frjálst og óháð. Ég veit að fólk er upp til hópa orðið þreytt á umræðum um Covid, en við verðum einfaldlega að gera þetta tímabil upp, af því að þessi faraldur sýndi okkur ákveðna hluti sem mega ekki endurtaka sig. Það er ekki í lagi að banna bara upplýsingar og setja eina línu sem enginn má véfengja. Þegar þrautreyndum læknum er bannað að fara eftir sannfæringu sinni erum við komin á mjög hálan ís. Í raun er verið að þvinga þá til að brjóta læknaeiðinn. Ég er sérfræðingur í heimilislækningum til áratuga og lá yfir gögnum og rannsóknum frá upphafi faraldursins, en ég mátti ekki nota þær meðferður sem allt benti til að væru bestar,” segir Guðmundur og nefnir þar meðal annars lyfið Ivermectin, sem var að hans sögn gert að samnefni fyrir samsæriskenningafólk og rugludalla:
„Ivermectin er þrautreynt lyf sem er nánast algjörlega án aukaverkana og hefur verið notað í áratugi á milljónir manna. Rannsóknirnar bentu strax til þess að þetta tiltekna lyf væri að gefa frábæra raun sem ein af meðferðunum við Covid. En einhverra hluta vegna var Ivermectin gert að einhvers konar bannorði. Lyf sem er með færri aukaverkanir en panodil og hefur verið gefið í 4 milljörðum skammta til mannfólks í gegnum tíðina. Við hljótum að geta verið sammála að það sé eitthvað skrýtið við þessi ofsafengnu viðbrögð gagnvart þeim læknum sem vildu nota þetta lyf. Ég var kærður af lyfjastofnun og mér var hótað fangelsisvist.“
Hægt er að nálgast viðtalið við Guðmund og öll viðtöl og podcöst Sölva Tryggvasonar inni á solvitryggva.is