Atli Þór Fanndal segir þá sem styðja Halldór Benjamín hjá Samtökum atvinnulífsins í kjarabaráttu Eflingar, séu að „drekkja“ sér „í snobbi“.
Fjölmiðlamaðurinn fyrrverandi og núverandi framkvæmdarstjóri Íslandsdeildar Transparancy International, Atli Þór Fanndal er þekktur fyrir að hafa munninn fyrir neðan nefið. Í nýrri færslu á Facebook skín sú staðreynd í gegn en þar blandar hann sér í umræðuna um kjaradeilur Eflingar og Samtaka atvinnulífsins. Segir hann þá sem styðja Halldór Benjamín hjá SA, vera að styðja snobb og biðlar til þeirra að vera ekki blind og heyrnalaus á stéttarfyrirlitninguna sem heyra má úr ranni SA.
„Þið sem haldið að Halldór Benjamín skilji betur hvernig hjarta Eflingarfólks slær en Sólveig Anna þurfið því miður að horfast í augu við að þið eruð að drekkja ykkur í snobbi. Ekki vera bæði blind og heyrnarlaus og neita að sjá stéttarfyrirlitninguna í því hvernig talað er um baráttu láglaunafólks. Það yrði mega vandró ef þið slysuðust til að fitja upp á nefið og setja upp hneykslunarsvip um hvernig þetta lið lætur og algjört lestarslys að skella í grein sem útskýrir að það er sko enginn femínismi að styðja láglaunakonur þótt maður hafi barist fyrir hvitþvætti á stjórnmálakonu sem notaði vald sitt til að ljúga um hælisleitendur, braut á barnshafandi konu sem flúði ofbeldi í heimalandinu, sendi annan hælisleitenda á götuna í Sviss til að verja stólinn sinn og notaði ráðherrastöðu til að hilma yfir. Úff! Ekki gera svoleiðis mistök bara vegna þess að þú sérð ekki fyrir snobbi,“ skrifaði Atli Þór á Facebook.