Lárus Helgi Ólafsson, kennari og handknattleiksmaður, skrifaði áhugaverðan pistil í gær um átökin á Gaza en Ísrael hefur verið sakað um að stunda þjóðernishreinsanir á svæðinu og hafa tugir þúsunda látist. Lárus nefnir sérstaklega að tíu þúsund börn hafi látist í átökunum sem engar vísbendingar eru um að muni ljúka á næstunni.
„Samt er það svo að hver sá sem dirfist til að benda á þessa hræðilegu atburði sem eru í gangi fyrir botni Miðjarðarhafs er úthrópaður gyðingahatari, þrátt fyrir að hvergi sé þar hatur að finna. Það er hræðilegt að sjá hvað alþjóðasamfélagið virðist vera veikt í þessu máli og allar þær þjóðir sem telji sig berjast fyrir friði í heiminum geri lítið annað en að senda frá sér burðarlitlar yfirlýsingar, sem megi sín lítils í stóra samhenginu.
Mín spurning er því, hvers vegna höfum við ekki hærra? Af hverju erum við ekki að vinna í því samhliða nágrannalöndum og öðrum bandamönnum okkar að fara í harðari aðgerðir? Hverju hafa diplómatísku leiðirnar skilað hingað til?,“ spyr Lárus. Þá fordæmir kennarinn árás Hamas sem gerð var þann 7. október og segir hann hafi ekki ennþá hitt manneskju sem réttlætir árásina. Það sé hins vegar ekki boðlegt að fólki á Gaza sé stefnt í lífshættu.
„Ég held að ég tali fyrir hönd mörg þúsunda Íslendinga þegar ég bið háttvirtan utanríkisráðherra og alla íslenska þingmenn um að beita sér af meiri krafti fyrir fólkið í Palestínu. Við viljum ekki líta til baka eftir mörg ár og hugsa til þess að við sem þjóð höfum ekki gert allt sem í okkar valdi stóð til þess að stoppa þessi átök. Gerið það, standið með þeim sem minna mega sín og geta sér enga björg veitt,“ skrifar Lárus að lokum í pistlinum sem birtist á Vísi.