Leit stendur enn yfir af Modestas Antanavicius sem lögreglan á Vesturlandi lýsti eftir í gær.
Modestas er 46 ára karlmaður en síðast er vitað um ferðir hans í Borgarnesi laugardaginn 7. janúar, samkvæmt Skessuhorni. Klukkan 14 í gær voru björgunarsveitir kallaðar út til leitar en leitað var fram á nótt í nágrenni Borgarness án árangurs. Í morgunsárið hófst leit að nýju en lögreglan er aukreitist að skoða upptökur úr öryggismyndavélum verslana í Borgarnesi þar sem hugsanlegt er að Modestas hafi komið.
Þyrla Landhelgisgæslunnar flaug með fram ströndinni allt frá vestur-Mýrum, um Borgarnes og suður fyrir Borgarfjarðarbrú, að sögn Skessuhorns.
Þeir sem hafa séð til Modestas eða vita hvar hann kann að vera niðurkominn eru beðnir að láta lögregluna á Vesturlandi vita í síma 444-0300 eða setja sig í samband við Neyðarlínuna í síma 112.