Lögreglan á höfuðborgarsvæðinu sendi ökumönnum áminningu í gær sem varðar sektargreiðslur. Minnt er sérstaklega á að bílstjórar þurfi að greiða 50 þúsund krónur séu þeir gripnir af lögreglu að aka gegn rauðu ljósi.
Þá segir lögreglan að upphæðin sé í raun smáaurar í samanburði við tjónið sem getur orðið þegar árekstur verður af þeim sökum. Slys á fólki er svo annað og miklu verra sem getur hlotist af þegar um slíkt gáleysi er að ræða.
„Þetta er nefnt hér vegna þeirrar fífldirfsku alltof margra ökumanna sem leyfa sér þá ósvífni að aka gegn rauðu ljósi í umferðinni. Sú ákvörðun er ávallt glórulaus og skapar mikla, óþarfa hættu, en því miður er þetta algeng sjón í umferðinni,“ segir meðal annars í tilkynningunni.
Lögreglan biður því ökumenn að sýna öðrum vegfarendum virðingu.