Magnea Hrönn Örvarsdóttir er látin. Hún varð fimmtug í upphafi árs. Margir minnast hennar á samfélagsmiðlum en líkt og Egill Helgasson nefnir þá varð hún fórnarlamb fíknar sem dró hana til dauað fyrir aldur fram. Magnea var tveggja barna móðir.
Ása Lind Finnbogadóttir minnist þess að þrátt fyrir veikindi sín hafi hún alltaf haft ýmislegt á döfinni. „Elsku Magnea er dáin. Ég hitti hana seinast á sýningunni sinni sem hún hélt á Núllinu um daginn. Ég er svo glöð að ég gat gefið henni knús áður en hún svo kvaddi þennan heim. Við vorum jafngamlar og hún var búin að biðja mig að spila í fimmtugsafmælinu sínu sem hún ætlaði að halda í nóvember á Iðnó þrátt fyrir að hafa átt afmæli í janúar. Hún var alltaf með einhver plön þrátt fyrir veikindin sín. Og stórkostlegt að hún skyldi ná að setja saman svona geggjaða sýningu. Ég mun minnast hennar með hlýju,“ segir Ása.
Egill Helgason fjölmiðlamaður segir að líf hennar hafi verið óskiljanlegur harmleikur. „Magnea Hrönn Örvarsdóttir varð fórnarlamb óstjórnlegrar fíknar sem nú hefur dregið hana til dauða fyrir aldur fram. Fyrir okkur vini hennar var líf hennar í seinni tíð óskiljanlegur harmleikur, hvað var það sem gekk á alla þessa daga og allar þessar nætur? Og símtölin sem eftir á að hyggja voru kannski frekar ákall um einhvers konar viðurkenningu en hjálp. En ég ætla að muna fallegu, gáfuðu og skemmtilegu stelpuna sem ég kynntist fyrir 30 árum og ég gat ekki annað en hrifist af. Ég sakna hennar.“