Magnús Tumi Guðmundsson, prófessor í jarðeðlisfræði, telur að gosinu muni senn ljúka en hægst hefur mjög á hraunflæði í dag
„Hitt er miklu líklegra að þetta bara fjari út og síðan fáum við endurtekið svipað ferli og verið hefur undanfarna mánuði,“ sagði Magnús við RÚV um málið.
„Það er náttúrulega langlíklegast að þetta bara fjari út. Það er ekki útilokað að það haldi áfram eitthvað lengur og það komist einhvers konar sírennsli. Það er einhver möguleiki sem við getum ekki útilokað, en þá verður þetta mjög svona rólegt rennsli.“
Í tilkynningu frá Veðurstofu Íslands sem kom út fyrr í kvöld er sagt að lítil skjálftavirkni hafi mælst á svæðinu í dag. Þá hafa sviðsmyndir verið ræddar á stöðufundum um hvað muni gerast nái hraun til sjávar.
„Ef hraun næði til sjávar gæti það valdið staðbundinni hættu vegna snöggrar kælingar á hrauni. Í fyrstu væri hætta vegna gjósku og gasmyndunar, fyrst og fremst saltsýra (HCI). Í um 500 m radíus frá þeim stað þar sem hraun kæmist í snertingu við sjó, væru aðstæður lífshættulegar. Eftir því sem fjær dregur minnkar hættan og er hverfandi í meira en 3 km fjarlægð,“ en Veðurstofan tekur þó fram að ólíklegt sé að það hraunið komist alla leið.