Baráttukonan Margrét Friðriksdóttir hefur skráð sig í alþjóðlega samanburðarrannsókn þar sem reynt verður að finna út hvor hópurinn er betur varður gegn kórónuveirunni, bólusettir eða óbólusettir. Varla þarf að taka það fram að Margrét tilheyrir síðari samanburðarhópnum enda hefur hún lengi talað gegn bólusetningum hér á landi gegn veirunni skæðu.
Til að berjast gegn sóttvarnaraðgerðum og bólusetningunum stofnaði Margrét vefsvæðið frettin.is sem á dögunum hlaut skráningu sem fjölmiðill. Í færslu á Facebook tilkynnti hún um rannsóknina sem hún tekur nú þátt í og samkvæmt henni má hún alls ekki láta bólusetja sig gegn Covid-19.
„Þá er ég búin að skrá mig í alþjóðlega samanburðarrannsókn á bólusetningum, ég má alls ekki láta bólusetja mig og fæ ég sérstakan passa sem staðfestir það, einungis óbólusettir geta tekið þátt í rannsókninni. Hlakka til að sjá niðurstöðu þessa rannsóknar sem snýst um að sjá hvor hópurinn er betur varður, þeir bólusettu eða óbólusettu,“ segir Margrét.
Fjölmargir tjá sig undir tilkynningu Margrét og lýsi yfir áhuga á að sjá niðurstöður rannsóknarinnar. Upplýsingafulltrúinn Lára Ómarsdóttir er þeirra á meðal. „Takk fyrir að taka þátt. Verður áhugavert að sjá niðurstöður,“ segir Lára.