Marinó G. Njálsson hafnar því alfarið að Búsáhaldarbyltingin hafi verið til einskis líkt og Bragi Halldórsson hefur haldið fram. DV fjallaði um færslu Braga fyrr í dag en líkt og fyrr segir telur hann að byltingin hafi verið til einskis. Marinó bendir á að þökk sé henni hafi Davíð Oddsson verið rekin úr starfi og að ríkisstjórn Geirs H. Haarde hafi farið frá völdum tveimur árum fyrr en hefði þurft.
Pistill Marinós í heild sinni:
Í færslu á Facebook er því haldið fram að Búsáhaldabyltingin hafi verið til einskis og þætti Harðar Torfasonar í henni sé ekki gert nægilega hátt undir höfði. Fjallað er um þessa færslu á dv.is.
Búsáhaldabyltingin skilaði kannski ekki öllu því sem fólk vonaðist til, en hún var ekki til einskis. Búsáhaldabyltingin varð til þess að ríkisstjórn Geirs H. Haarde fór frá völdum tveimur árum fyrr en hefði þurft. Búsáhaldabyltingin varð til þess að Davíð Oddsson var rekinn úr starfi seðlabankastjóra. Búsáhaldabyltingin varð til þess að Stjórnlagaráð skrifaði drög að nýrri stjórnarskrá, þó fjórflokkurinn komi enn í veg fyrir að þjóðin fái hana. Búsáhaldabyltingin varð til þess að spilling fyrirhrunsáranna var rannsökuð. Búsáhaldabyltingin varð upphafið að siðbót, sem ekki sér fyrir endann á, þó hún mætti ganga hraðar og vera meiri. Búsáhaldabyltingin hratt af stað viðhorfsbreytingu hjá stórum hlutaþjóðarinnar, þó svo að ákveðinn hluti hafi forherst í sinni skoðun.
Nei, Búsáhaldabyltingin varð ekki til einskis, en hún hefði mátt leiða til meira afgerandi breytinga og við verðum að passa okkur á því að gefa ekki eftir með kröfur okkar til breytinga og siðbótar.
Höfundur færslunnar, sem ég vísaði til, telur Hörður Torfason ekki njóta þeirrar virðingar og viðurkenningar sem hann á skilið vegna hans framlags til Búsáhaldabyltingarinnar. Ég vona innilega, að Hörður hafi ekki farið af stað með útifundina til að öðlast virðingu og viðurkenningu, heldur vegna þess að honum misbauð óréttlætið. Hann þurfti a.m.k. ekki frekari virðingar eða viðurkenningar hjá mér. Hann hafði fyrir löngu áunnið sér hana með óeigingjarnri baráttu sinni fyrir sjálfsögðum réttindum samkynhneigðra. Hans þáttur í Búsáhaldabyltingunni er kominn á spjöld sögunnar. Hans góði orðstír mun ekki deyja.
Margir tóku þátt í Búsáhaldabyltingunni og fóru fyrir hinum ýmsum hersveitum hennar. Því miður var ekki þáttataka allra af sömu óeigingirni og Harðar. Það var kannski þess vegna sem vatnaði undan henni. Fólkið sem var þarna vegna byltingar almúgans gafst upp á fólkinu sem var þarna til að ota sínu tota. Talaði við mann um daginn, sem var mjög ötull í baráttunni, en gafst upp, þegar egóið varð ofan á. Fyrir kosningarnar árið 2013 náði þessi sjálfhverfa hámarki, þegar umbótaöflin gengu hvert af öðru dauðu með því að hafna samvinnu.
Að þessu leyti át byltingin börnin sín, en hún skildi eftir kartöflur víða í samfélaginu, sem sést í óþoli stórra hópa fyrir fúskinu í Íslandsbankasölunni, viðskiptaháttum Samherja í Namibíu, auðsöfnuninni hjá kvótagreifum, óréttlætinu sem tekjulágir búa við og svona mætti lengi telja. Allt eru þetta málefni sem hefðu ekki farið hátt fyrir 20-30 árum.
Búsáhaldabyltingin var ekki til einskis og góður orðstír Harðar Torfasonar mun lifa á spjöldum sögunnar.
—
Ég tók á ýmsan hátt þátt í Búsáhaldabyltingunni. Það var með skrifum á Mogga-blogginu, þátttöku í starfi Hagsmunasamtaka heimilanna, mætti á fundi hjá Herði (var einu sinni ræðumaður), hef veitt erlendum fjölmiðlum fleiri viðtöl en tölu verður á komið (það síðasta var núna í sumar) og skrifað óteljandi pistla með ábendingum um það sem betur má fara, kröfu um réttlæti, sanngirni og jöfnuð. Hjá mér er baráttan enn í gangi og hún mun ekki hætta meðan breytinga er þörf, enda holar dropinn steininn. Auðvitað hefði ég viljað að breytingarnar hefðu verið meiri og gengi hraðar, en ég ætla heldur ekki að vanmeta þær sem hafa orðið.