Árið 2024 var ár sorgar, harmleika, veikinda en líka poppstjörnunnar Bríetar ef marka má lestrartölur Mannlífs. Við höfum nú tekið saman tíu mest lesnu fréttir ársins en nokkrar fréttir stóðu upp úr en um leið vill ritstjórn Mannlífs þakka kærlega fyrir stuðninginn á árinu og óskum við þjóðinni gæfuríks komandi árs, fullu af ást og birtu.
10. Sprenging heima hjá Bríeti: „Heyrðu, ég ætlaði að fara að sofa! Ertu ekki að grínast?“
Mynd: Instagram-skjáskot
Poppprinsessan Bríet Ísis Elfar lenti í kröppum dansi í upphafi árs þegar hún ætlaði sér að kæla orkudrykk á svölunum. Ekki tókst betur til en að drykkurinn hreinlega sprakk í íbúð Bríetar og átti hún í fullu fangi með að þrífa ósköpin.
9. Svala veiktist hratt og á nú erfitt með gang: „Þakka ykkur kærlega fyrir allar fallegu kveðjurnar“
Ljósmynd: Instagram-skjáskot
Kennarinn og áhrifavaldurinn Svala Fanney Snædahl Njálsdóttir veiktist snögglega í mars á þessu ári en á stuttum tíma missti hún mátt í löppunum og hætti að geta gengið. Reyndist um Guillain Barré Syndrome að ræða en með endurhæfingu og eljusemi er Svala Fanney farin að geta gengið aftur.
8. Sorg í Sandgerði – Steypustöðin harmar banaslysið í yfirlýsingu
Alvarlegt bílslys varð á Grindarvíkuvegi þann sjötta janúar þar sem tveir létu lífið. Einstaklingarnir sem létust voru frá Sandgerði og ríkti því mikil sorg í bæjarfélaginu. Steypustöðin sendi frá sér tilkynningu vegna slyssins en ökutæki á þeirra vegum rann á hitt ökutækið en í tilkynningunni harmaði fyrirtækið banaslysið.
7. Haltrandi fastakúnni gripinn með þýfi innanklæða: „Hún labbar um alla búðina og treður inn á sig“
Eigandi verslunarinnar Systur og makar sagði frá ótrúlega bíræfnum fastakúnna sem tróð helling af vörum inn á sig og ætlaði sér að ganga með varninginn út úr búðinni án þess að greiða. Um var að ræða konu sem gekk með staf, sem hafði margoft verslan í búðinni og afgreiðslufólk hafði oft stjanað við hana. Að lokum náðust þó sáttir en það er önnur frétt.
6. Aron Mola og Bríet á sjóðheitri pottamynd – Ekki fyrir viðkvæma!
Ljósmynd: Instagram-skjáskot
Vinirnir Aron Mola, leikari og áhrifavaldur og söngdívan Bríet birtu eina fyndnustu ljósmynd seinni ára, að marga mati, en um var að ræða endurgerð á pottmynd sem Aron birti árið 2019 en í þetta sinn gekk hann skrefinu lengra. Var hann með þessu að gera léttvægt grín að rassaljósmyndum áhrifavalda á Instagram.
5. Bríet sjóðheit í gegnsæjum kjól: „Passa sig“
Ljósmynd: Instagram-skjáskot
Enn og aftur sló frétt um Bríeti rækilega í gegn hjá lesendum Mannlífs enda um hæfileikabúnt að ræða sem hefur þar að auki útlitið með sér. Bríet er ekki aðeins þekkt fyrir seiðandi rödd sína og flotta popptónlist, heldur einnig fyrir frumlegan klæðaburð. Er hún afar dugleg að leyfa fylgjendum sínum á Instagram að fylgjast með gerð ýmissa kjóla og múnderinga sem hún klæðist á sviðinu en í þessari frétt er sagt frá sjóðheitum kjól sem hún hafði hannað.
4. Kunningi meints morðingja í Neskaupstað: „Alveg greinilegt að hann var orðinn veikari“
Eitt af fjölmörgum morðum sem skók þjóðina í ár var hið tvöfalda morð á hjónum á áttræðisaldri í Neskaupsstað í ágúst. Mannlíf ræddi við kunningja hins meinta banamanns en hann sagði manninn hafa virst afar veikur á geði stuttu fyrir morðin en hann hafði um langt skeið glímt við geðræn vandamál og fíkniefnavanda. Að sögn kunningjans var maðurinn venjulega „mjög fínn og skemmtilegur“ en hafi bersýnilega verið orðinn veikari rétt fyrir morðin.
Enn einn harmleikur varð þegar ungur maður að nafni Ingvi Hrafn Tómasson stytti sér aldur inni á Litla-Hrauni í maí. Hafði hann glímt við fíkniefnavanda en var á batavegi. Var hann nærri því búinn að ljúka afplánun á fangaheimilinu Vernd þegar hann var aftur sendur í fangelsið á Litla-Hrauni vegna meintrar kæru. Faðir hans heimtaði rannsókn á andlátinu en hann sagði Ingva Hrafn hafa í örvæntingu sinni leitað hjálpar daginn fyrir andlátið en verið sagt að bíða framyfir helgi.
2. Fiskbúð Fúsa lokar: „Ég er að fara í smá aðgerð“
Sigfús Sigurðsson hefur lengi verið einn af óskasonum þjóðarinnar, fyrst sem landsliðsmaður í handbolta og nú sem ástsæll fisksali. Því kemur það lítið á óvart að næst mest lesna fréttin skuli fjalla um tímabundna lokun Sigfúsar í janúar á fiskverslun sinni Fiskbúð Fúsa. Ástæðan var sú að hann hugðist ganga undir „smá aðgerð“. Verslunin opnaði síðan aftur nokkrum vikum síðar og gátu þá viðskiptavinir Fúsa tekið gleði sína á ný.
1. Guðbjörg Svava lést úr lungnabólgu
Vinsælasta frétt ársins 2024 á Mannlífi snéri að dánarorsök hinnar 37 ára gömlu Guðbjargar Svövu Guðmundsdóttur, sem lést 20. október 2023. Faðir hennar, Guðmundur Sigurður Guðmundsson staðfesti við Mannlíf að dóttir hans hafði látist vegna lungnabólgu. Guðbjörg Svava hafði glímt við mikla erfiðleika í sínu lífi en eiginmaður hennar, Tómas Waagfjörð, var stunginn til bana á Ólafsfirði árið 2022. Ekki missti Guðmundur einungis dóttur sína þann 20. október, heldur lést eiginkona hans, Annika, einnig þann dag.