Ágreiningur hefur verið á milli Reykjavíkurborgar og innviðaráðuneytis vegna uppbyggingar Nýja-Skerjafjarðar. Borgin hefur að auki fengið á sig harða gagnrýni frá íbúum Skerjafjarðar, sem hefur fundist framganga borgarinnar litast af tillitsleysi þar sem fórna ætti bæði almannaheillum og einstöku dýralífi í ósnortinni fjöru, undir formerkjum þess að Nýi-Skerjafjörður verði græn byggð.
Framsókn hefur áhrif
Samruni Framsóknar við sitjandi meirihluta virðist því hafa skilað sér, þar sem borgin ætli nú að virða samninga við ríkið um innanlandsflug, taka tillit til faglegs áhættumats í samstarfi við Isavia og taka afstöðu um landfyllinguna á grundvelli yfirstandandi umhverfismats.
Á heimasíðu Framsóknar má sjá áherslur þeirra en þar kemur fram:
„Framsókn vill halda áfram að styrkja og efla innanlandsflugvelli, fjölga tækifærum í ferðaþjónustu og skapa atvinnu heima fyrir. Sjúkraflug hefur aukist verulega á síðustu árum og er orðinn lykilþáttur í heilbrigðiskerfi landsbyggðarinnar. Öryggishlutverk innanlandsflugvalla er því orðið mun mikilvægara en áður og brýnt að þeim sé viðhaldið. Einnig þarf að tryggja að viðeigandi búnaður sé tiltækur svo þeir geti þjónað hlutverki sínu sem slíkir.“
Um flugvöllinn í Samstarfssáttmálum
„Innanlandsflugvöllur gegnir mikilvægu hlutverki fyrir farþegaflutninga innanlands og sjúkraflug. Við ætlum að virða alla samninga Reykjavíkurborgar og ríkisins um innanlandsflug, Reykjavíkurflugvöll og flutning flugvallarins í Hvassahraun á grundvelli veðurfarsrannsókna. Við viljum byggja nýtt hverfi í Skerjafirði, taka tillit til Reykjavíkurflugvallar á byggingartíma þess og taka tillit til faglegs áhættumats og mótvægisaðgerða vegna vindafars sem útfærðar verða í samvinnu við Isavia. Tekin verði afstaða til landfyllingar og útfærslu hennar á grundvelli yfirstandandi umhverfismats.“
Á vefsíðu Reykjavíkurborgar hefur verið birtur samstarfssáttmáli Samfylkingar, Framsóknar, Pírata og Viðreisnar. Hann má lesa hér.