Hildur Hermóðsdóttir, stofnandi bókaútgáfunnar Sölku, var jarðsungin í gær. Í kjölfarið minntust núverandi eigendur Sölku Hildar, á samfélagsmiðlinum Facebook.
„Hildur ruddi nýjar brautir í íslenskri bókaútgáfu með stofnun Sölku. Hún lagði áherslu á að gefa út bækur eftir konur og um konur og var það nýlunda í bransanum hér á landi. Að auki var forlagið í eigu kvenna og konur fóru með ritstjórnarvald. Bækur sem áður höfðu ekki fengið brautargengi litu dagsins ljós,“ greina Dögg Hjaltalín og Anna Lea Friðriksdóttir frá í færslunni.
Þær segja Hildi ávallt hafa verið trú hugsjón sinni og byggt upp sterka bókaútgáfu sem ögraði viðteknum venjum „Hildur var á undan sinni samtíð á margan hátt, bæði hvað varðar jafnrétti í bókaútgáfu, kvennabaráttu og náttúruvernd.“
„Við vorum svo lánsamar að fá tækifæri til að vinna með Hildi, bæði sem bóksalar á árum áður og svo þegar hún treysti okkur fyrir að varðveita arfleifð sína undir merkjum Sölku. Fallegum hring var lokað þegar Hildur gaf út bók sína, Ástin á Laxá, hjá okkur,“ rita þær Anna Lea og Dögg.
Í bókinni greindi Hildur frá sögu fjölskyldu sinnar og sveitunga á ljóslifandi hátt.
„Hún fangaði ástina á náttúrunni og brá upp myndum af fólkinu sem verndaði hana með samheldni og eldmóð að vopni. Eldmóður Hildar dvínaði aldrei og hennar hjartans mál voru engum dulin. Hún skrifaði söguna í mörgum skilningi.“
Undir færsluna rita „Sölkurnar“ eða þær Anna Lea Friðriksdóttir og Dögg Hjaltalín
Hér að neðan má sjá færslu frá eigendum Sölku:
Tengd frétt: