Daníel Gunnarsson hefur verið dæmdur í 24 ára fangelsi í barnaníðsmáli á hendur honum í Bandaríkjunum.
Daníel, sem er 23 ára Íslendingur, var í fyrra sakfelldur fyrir morð og limlestingu á vinkonu sinni í Bandaríkjunum. Hann gerði dómsátt við ákæruvaldið um að hann hljóti dóm fyrir þrjá af tólf ákæruliðum í máli sem snýr að barnaníð. Hann hefur þannig verið sakfelldur fyrir lostafulla háttsemi gegn barni undir fjórtán ára aldri en einnig var hann ákærður fyrir að þvinga barn undir tíu ára aldri til munnmaka eða samneytis fjórum sinnum og fyrir vörslu á barnaníðsefni.
Faðir Daníels er íslenskur en móðir hans af tékkneskum uppruna en hann flutti með móður sinni til borgarinnar Ridgecrest í Kaliforníuríki þegar Daníel var barn en brotin sem hann hefur nú verið sakfelldur fyrir, áttu sér stað í Kern-sýslu í Kaliforníuríki.
Brotin áttu sér stað, samkvæmt ákærunni frá árinu 2016 til 2021 er hann var handtekinn grunaður um morðið á Katie Pham, sem hann var í fyrra sakfelldur fyrir og dæmdur í 25 ára fangelsi.
Daníel var í september í fyrra dæmdur fyrir að myrða hina 21 árs gömlu Katie Pham en morðið átti sér stað í maí 2021. Aðeins nokkrum vikum síðar ákvað dómarinn að dæma Daníel frá 25 ára fangelsi og upp í lífstíðarfangelsi. Þau Daníel og Pham voru bekkjarsystkini en áttu einnig í stuttu ástarsambandi en hann notaði ísnál við morðið á henni. Þá var hann sagður hafa snert lík hennar á kynferðislegan hátt en hann var auk þess, eins og áður segir, sakfelldur fyrir að limlesta lík Pham.
