Gríðarmikill eldur kviknaði í þvottahúsi Vasks á Egilsstöðum um klukkan 16:20 síðdegis í dag. Slökkvilið og aðrir viðbragðsaðilar mættu fljótt á staðinn og fljótlega var ljóst að fólk væri ekki í hættu.
Mikinn reyk bar frá staðnum til norðurs og voru nágrannar fljótt beðnir um að loka gluggum og hvatt til að vera ekki á ferðinni í nágrenni brunans því það gæti hindrað störf viðbragðsaðila.
Lögreglan á Austurlandi biður fólk á Egilsstöðum um að hafa glugga lokaða bæði í kvöld í nótt til að tryggja að reykur berist ekki inn í hús eftir stórfelldan brunann. Slökkvilið er búið að ná tökum á brunanum.
Samkvæmt upplýsingum lögreglu er nú unnið að því að slökkva í glæðum en gera megi ráð fyrir því að slökkvistarf haldi áfram fram á kvöld.
Rannsókn hefst á morgun á upptökum brunans en talið er að hann hafi byrjað í þvottahúsi húsnæðis Vasks. Vaskur er þvottahús, efnalaug og verslun sem selur hreinlætisvörur, skrifstofuvörur, hljóðfæri, víngerðarefni og fleira.
Hér fyrir neðan má sjá myndbönd af hinum mikla bruna: