- Auglýsing -
Mbl.is greinir frá því að kona á níræðisaldri hafi látist á sjúkrahúsi á Akureyri vegna nóroveirusýkingar en hún hafi smitast á hóteli á Austurlandi.
Samkvæmt Heilbrigðiseftirliti Austurlands sýktust minnst 12 manns en sýkingarinnar varð vart síðastliðinn fimmtudag.
Munu tveir hópar fólks hafa smitast, annarsvegar hópur ferðamanna og hinsvegar hópur kvenna úr Skagafirði.
Veitingastað hótelsins var lokað og hótelið sótthreinsað. Eftir því sem best er vitað hafa ekki fleiri smitast eftir að hótelið var sótthreinsað.
Nóróveiran er bráðsmitandi en skv. Alþjóða Heilbrigðisstofnuninni greinast um 685 milljón tilfelli og um 200 þúsund manns látast vegna veirunnar á ári hverju. Nóróveiran finnst gjarnan í skelfiski og ferskvöru.