Talsvert var um óvelkomna einstaklinga á ýmsum stöðum á höfuðborgarsvæðinu í gærkvöldi og í nótt, samkvæmt dagbók lögreglunnar.
Kengölvaður einstaklingur var til vandræða á endurvinnslustöð í gær en hann veittist að lögreglumönnum sem ætluðu sér að ræða við hann. Var hann að lokum handtekinn og vistaður í fangaklefa þar til víman rennur af honum og hægt verður að taka af honum skýrslu vegna málsins.
Annar einstaklingur var handtekinn af lögreglunni sem þjónustar Vesturbænum, Miðborginni, Hlíðunum, Laugardalnum, Háaleiti og Seltjarnarnesi. Hafði hann gert heiðarlega tilraun til þess að sparka í lögreglumenn sem höfðu afskipti af honum. Hótaði hann lögreglumönnum og fjölskyldum þeirra lífláti. Var hann handtekinn eins og fyrr segir og settur í fangaklefa en skýrsla verður tekin af honum þegar víman rennur af honum.
Þá var óskað eftir aðstoð lögreglu á veitingastað vegna tveggja ölvaðra einstaklinga sem voru til vandræða. Var þeim vísað út. Lögreglan kom þriðja ölvaða einstaklingnum af öðrum veitingastað, til síns heima en hann hafði verið til vandræða.
Barn féll af reiðhjóli og hlaut minniháttar áverka en var flutt með sjúkrabíl á Bráðamóttökuna til skoðunar.
Óvelkominn aðili kom sér fyrir á hóteli og var óskað eftir aðstoð lögreglu, sem vísaði honum út. Þá var einnig óskað eftir aðstoð lögreglu í verslun eftir að einstaklingur neitaði að yfirgefa verslunina. Var honum vísað út.
Ökumaður bifreiðar var stöðvaður, grunaður um akstur undir áhrifum fíkniefna. Reyndist hann vera sviptur ökuréttindum vegna fyrri afskipta lögreglu.
Í Hafnarfirði var lögreglan kölluð til vegna mótmæla við Héraðsdóm Reykjaness.
Lögreglan sem annast útköll í Kópavogi og í Breiðholtinu fékk tilkynningu um þjófnað úr verslun. Þá vísaði hún kengdrukknum einstaklingi af veitingastað en hann hafði verið þar til vandræða.
Eitt og annað gekk á hjá lögreglunni sem annast útköll í Árbænum, Grafarholtinu, Grafarvoginum, Norðlingaholtinu, Mosfellsbænum, Kjósarhreppinum og á Kjalarnesi. Ölvaður einstaklingur neitaði að yfirgefa veitingastað þar sem hann hafði verið til vandræða. Lögreglan vísaði honum út.
Óskað var eftir aðstoðar lögreglunnar í verslun vegna ölvaðs unglings. Lögreglan hafði samband við móður unglingsins sem sótti hann.
Ökumaður var stöðvaður grunaður um akstur undir áhrifum fíkniefna. Einnig er hann grunaður um vörslu fíkniefna.