Séra Kristinn Ágúst Friðfinnsson, faðir Friðfinns Freys Kristinssonar, 42 ára manns sem ekkert hefur spurst til síðan á fimmtudaginn, segir í samtali við DV að hann hafi haft fregnir af syni sínum. Vinkona Friðfinns tjáði Séra Kristni að Friðfinnur hafi verið í talsambandi við par í undirheimunum. Karlinn í því sambandi sé enn fremur sagður mjög hættulegur.
DV greinir einnig frá því að orðið á götunni sé að menn í undirheimunum hafi ógnað Friðfinni undanfarið vegna skulda. Friðfinnur hafði átt í fíknivanda en um nokkurt skeið verið á beinu brautinni. Hann hafi þó fallið stuttu áður en hann hvarf.
Séra Kristinn segir vísbendingar í málinu vera mjög misvísandi. „Þetta er þvers og kruss. Mér finnst svo skrýtið að hundarnir fóru niður að sjó, þannig að það stangast allt á. Lögreglan fann þarna skó á leiðinni niður að sjó og þess vegna var talið að hann hefði farið í sjóinn. En svo kemur í ljós að þetta eru alls ekki skórnir hans.“