Ólafur Stephensen, framkvæmdastjóri Félags atvinnurekenda, segir það orðið lífsnauðsynlegt fyrir afkomu fjölmiðla að leyfðar verði áfengis- og tóbaksauglýsingar hér á landi. Á meðan það sé bannað rennur næstum helmingur auglýsingatekna til erlendra fjölmiðla, einkum samfélagsmiðlafyrirtækjanna.
Ólafur bendir á að hlutfall auglýsingatekna sem renni til erlendra miðla sé sífellt að aukast og hafi það ellefufaldast á síðustu tíu árum.
„Við höfum talað fyrir því áratugum saman að áfengisauglýsingar verði leyfðar með sömu skilyrðum og eru til dæmis í Svíþjóð. Það hefur aldrei náð í gegn. Við sjáum bara í okkar samfélagsmiðlaumhverfi hvaða afleiðingar þetta hefur. Það eru áfengisauglýsingar úti um allt í þessu umhverfi, meðal annars frá íslenskum áfengisnetverslunum, og íslenskum framleiðendum jafnvel. Þetta eru tekjur sem fljóta fram hjá íslenskum fjölmiðlum og til erlendu samfélagsmiðlanna,“ segir Ólafur í samtali við Morgunblaðið og bætir við:
„Þetta er víðar svona, auglýsingar fyrir nikótínvörur sem dæmi. Það eru gríðarlega þröngar hömlur á auglýsingum innanlands og þessar auglýsingar leita þá baraáerlenda miðla í staðinn. Það er partur af vandamálinu; þessi boð og bönn innanlands. Svo hefur farið fram ákveðin vinna sem snýr að því að skattleggja þessa miðla með sama hætti og innlendir miðlar eru skattlagðir. Ég hugsa að það væri líka skref í þá áttina.“