Ráðalaus íbúi fjölbýlis í vesturhluta borgarinnar mátti leita á náðir lögreglu í nótt. Orsökin var háværar kynlífsstunur og samlífslæti sem bárust frá einni íbúð hússins – svo ekki var svefnfriður í húsinu. Algjörlega ósofinn vegna unaðshljóðanna gat íbúinn loks lagst sæll á koddann eftir að lögreglan mætti á vettvang. Samkvæmt dagbók lögreglu var málið kannað.
Töluvert annríki var hjá lögreglu í nótt og tilkynningar allmargar. Miðbærinn var venju samkvæmt fullur af fjöri og ölvun. Mátti lögregla þá biðja starfsfólk ótilgreinds skemmtistaðar að lækka í gleðinni – sem það lofaði og gerði.
Þá var óskað eftir aðstoð lögreglu vegna tveggja líkamsárása, annars vegar í miðbænum og hins vegar í umdæmi Garðabæjar og Hafnarfjarðar. Lögreglan greindi ekki frekar frá atvikunum.
Lögreglan sinnti jafnframt umferðargæslu. Töluvert var um grun aksturs undir áhrifum. Í umdæmi lögreglu Garðabæjar og Hafnarfjarðar var ökumaður stöðvaður og voru þrjú börn í bifreiðinni. Eftir eftirgrennslan lögreglu kom í ljós að ekkert þeirra var í viðeigandi öryggisbúnaði. Ökumaðurinn fékk tiltal og var sektaður. Lögreglan sendi Barnaverndaryfirvöldum tilkynningu um málið.