Össur rífur Sjálfstæðisflokkinn í sig: „Þegar menn standa í skít upp að hálsi …“

Súrrealískt er að sjá að þegar ísraelskir leyniþjónustumenn fletta ofanaf hrossakaupum og spillingu innan Sjálfstæðisflokksins þá bregst sá sem flett er ofan af við með aumkunarverðri tilraun til að kenna nafngreindum frambjóðendum Samfylkingarinnar um uppljóstrunina. – Tilefnið? Jú, frambjóðendurnir unnu einhvern tíma með fréttamönnum Heimildarinnar. Þeir ágætu fréttamenn hafa reyndar ekkert til saka unnið í þessu ótrúlega máli annað en birta efni sem þeim var sent og virðist svo sannarlega eiga erindi við þjóðina.“

Þannig hefst færsla Össurar en í næstu orðum talar hann fyrir því að hlutverk forystu Sjálfstæðisflokksins verði rannsakað:

„Þegar menn standa í skít upp að hálsi bjargar það aldrei neinu að kasta skítnum í saklausa áhorfendur. Slíkur darraðardans ýtir mönnum yfirleitt lengra niður í kviksyndið. Þannig gefur samtalið sem Heimildin birti fulla ástæðu til að krefjast þess að hlutverk forystu Sjálfstæðisflokksins verði rannsakað í kjölinn. Þar er nefnilega fullyrt af innvígðum Sjálfstæðismanni að hún hafi vitandi vits ætlað Jóni Gunnarssyni að gefa út hvalveiðileyfi m.a. í þeim tilgangi til að ná til baka atkvæðum sem tapast höfðu vegna aumingjaskapar flokksins á fyrri stigum málsins. Semsagt, flokkshagsmunir fram yfir almannahagsmuni – enn einu sinni. Varla stöðvast þó frjálst fall flokksins í skoðanakönnunum við þessa tragísku uppákomu.“

Að lokum segir Össur að meint spilling Sjálfstæðisflokksins verði ofar á dagskrá en ella fyrir komandi kosningar:

„Líklega má þó þakka Jóni Gunnarssyni og óopinberri stassjón Mossads að frjáls fjölmiðlun, auðlindasukk og meint spilling Sjálfstæðisflokksins verða mun ofar á dagskrá kosninganna en ætla mátti í upphafi.“