Páll heldur áfram með geðveikina: Gefur til kynna að allir starfsmenn RÚV þurfi hópmeðferð

„RÚV þegir um þessar nýjustu vendingar í Namibíumálinu. Sennilega pantaði Efstaleiti hópmeðferð á geðdeild,“ skrifar Páll Vilhjálmsson, kennari við Fjölbraut í Garðabæ, á bloggsíðu sína, sama dag og skólameistari hans, Kristinn Þorsteinsson, snuprar hann fyrir fordóma gagnvart geðsjúkum. Tiltal skólameistar til kennarans kom í framhaldi af rætnum ummælum Páls um Helga Seljan fréttamann sem Páll taldi óhæfan til að gegna starfi fréttamanns vegna þess að hann hafði glímt við þunglyndi.

Páll er hvergi keikur og gefur ekkert fyrir ákúrur skólameistarans en heldur áfram að velta sér upp úr mögulegri geðveiki starfsmanna Ríkisútvarpsins. Nú er það í samhengi við það að Samherjamenn verði ekki ákærðir í Namibíu, hvorki sem einstaklingar né lögaðilar, í tengslum við mútumálið.

„Samkvæmt namibískum fjölmiðli, Namibian, verða aðeins namibískir aðilar ákærðir. Samstarfsfjölmiðill RÚV, Kjarninn, viðurkennir ósigurinn með yfirlýsingu: Í ákæru­skjali sem Kjarn­inn hefur undir höndum má sjá að á meðal ákærðra ein­stak­linga og félaga í mál­inu eru ekki Íslend­ing­arnir þrír sem Martha Imalwa, rík­is­sak­sókn­ari Namib­íu, hefur sagt að hún ætli sér að ákæra, né heldur namibísku félögin sem þeir stýrðu fyrir hönd Sam­herja,“ skrifar Páll.

HAnn segir að RÚV hafi böðlast á Samherja í áratug.

„Árið 2012 blekkti RÚV Seðlabanka Íslands til að gera húsleit hjá Samherja vegna gjaldeyrisviðskipta. RÚV falsaði skjöl í þessum tilgangi en allt kom fyrir ekki. Samherji var sýknaður fyrir dómstólum.  Árið 2019 hófst önnur atlaga RÚV að Samherja, að þessu sinni í samstarfi við Jóhannes Stefánsson fyrrum starfsmann norðlensku útgerðarinnar í Namibíu,“ skrifar Páll.

Hann segir að RÚV hafi beitt öllu sínu afli gegn Samherja í óteljandi fréttum í sjónvarpi, útvarpi og á netinu. Linnulaust hafi sekt Samherja í Namibíu verið haldið fram. Í því samhengi uppnefnir hann Helga Seljan og Jóhannes Stefánsson uppljóstrara.

„En svo reynist Samherji saklaus í Namibíu. Ekki einu sinn saksóknarinn í Namibíu trúir skáldskap RÚV og Jóhannesar. Á daginn kemur að Samherji keypti kvóta með lögmætum hætti. Namibísk lög kveða á um að kvótahafar skulu vera innlendir ríkisborgarar. Samkvæmt namibískum fjölmiðlum var eitt og annað áfátt með hvernig namibískir aðilar komust yfir kvótann og hvernig ábatanum var ráðstafað. Þessir aðilar eru ákærðir. En Samherji stundaði viðskipti og veiddi makríl. Meintir glæpir norðlensku útgerðarinnar voru skáldskapur, uppspuni RÚV-Helga og Jóa. RÚV þegir um þessar nýjustu vendingar í Namibíumálinu. Sennilega pantaði Efstaleiti hópmeðferð á geðdeild,“ skrifar Páll og sýnir skólameistara sínum klærnar.