Páll Erlendsson segir stoltur frá því að hann sé genginn í sömu alþjóðlegu rannsóknina og baráttukonan og ritstýran Margrét Friðriksdóttir. Hann hafi nú passa upp á höndina sem segi að hann megi alls ekki vera bólusettur og fullyrðir að með því megi ekki meina honum aðgang að stöðum sem krefjast bólusetningarskírteinis.
„Þetta er svo innilega gott mál þar sem ég myndi frekar drekka olíuna af bílnum mínum en að láta bólusetja mig með lyfi sem enginn veit hvaða áhrif hafa á okkar viðkvæma líkama,“ segir Páll í færslu á Facebook.
Margrét hefur skráð sig í alþjóðlega samanburðarrannsókn þar sem reynt verður að finna út hvor hópurinn er betur varður gegn kórónuveirunni, bólusettir eða óbólusettir. Varla þarf að taka það fram að Margrét tilheyrir síðari samanburðarhópnum enda hefur hún lengi talað gegn bólusetningum hér á landi gegn veirunni skæðu.
Til að berjast gegn sóttvarnaraðgerðum og bólusetningunum stofnaði Margrét vefsvæðið frettin.is sem á dögunum hlaut skráningu sem fjölmiðill. Hún tekur nú þátt í þessari alþjóðlegu rannsókn og samkvæmt henni má hún alls ekki láta bólusetja sig gegn Covid-19. Hið sama á núna við um Pál sem gengur með sama skírteinið í vasanum þessa dagana og Margét.
Hjartaskurðlæknirinn Tómas Guðbjartsson er hins vegar ekki par hrifinn af hegðun Margétar. Hann segir hana á leið í einhvers konar harakiri-leiðangur sem stofni ekki aðeins hennar lífi í hættu heldur margra annarra.
Páll birti svo fyrir skömmu aðra færslu á Facebook þar sem hann segir frá heimsókn sinni til Þórólfs Guðnasonar sóttvarnarlæknis. Páll fullyrðir að hann hafi séð svip samviskubits á andliti læknisins. Til nánari útskýringar skulum við gefa honum orðið:
„Málið er að eftir að hafa hitt Þórólf í morgun og átt við hann stutt spjall, þá tók ég greinilega eftir að það sem hann er að eiga við í samvisku sinni er alls ekki auðvelt. Í fyrsta lagi er hann alveg með á hreinu að það er fullt af fólki að skaðast vegna bólusetninga. Hann veit líka að það er fullt af fólki sem mun skaðast af covid. Hann er læknisfræðilega menntaður og telur út frá sinni þekkingu að ávinningurinn sé mun meiri í því að láta bólusetja alla.
Það hefur verið ákveðin töfralausn í gegnum árin, að bólusetja fólk við ýmsum sjúkdómum. Núna er staðan bara svo allt önnur. Staðreyndin er sú að bóluefnin eru ekki að virka eins vel og fyrri bóluefni annara sjúkdóma. Í öðru lagi eru mikið fleirri aukaverkanir og líkamleg vandamál tengdum flestum covid bóluefnunum sem verið er að gefa í dag.
Þórólfur og hans fólk er að reyna að vega og meta hvað sé best að gera og hans ákvörðun er að bólusetja sem flesta m.a. vegna þess að trúin hans er sú að bólusetning einstaklinga minnki áhrif veikindanna til muna og færri þurfi á læknisþjónustu að halda. En svo er það okkar hlið sem viljum ekki láta bólusetja okkur, við viljum ekki taka þá áhættu að við fáum aukaverkun og jafnvel alvarlega aukaverkun og finnst okkur því best að sleppa því og eigum við að eiga fullan rétt á því að við neitum bólusetningum fyrir okkur sjálf.
Vandamálið sem er oft með bólusetningar er sú að aukaverkanir af þeim geta komið í ljós nokkrum árum eftir að bólusetning hefur verið framkvæmd og í tilfelli covid bólusetninganna, þá vitum við mögulega of lítið um þær auk þess hvað það er mikið um alvarlegar aukaverkanir og líka mikið um vægar aukaverkanir.
Ég tel mig heppinn að hafa fengið covid sjálfur og er því með náttúrulegt ónæmi og fyrir mitt líf finnst mér það vera besta lausnin. Fyrir mig!. Þú að sjálfsögðu gerir það sem þú vilt, hvort þú lætur bólusetja þig eða ekki, er alfarið þitt mál því við tökum að lokum öll ábyrgð á okkur sjálfum. Ég læt þetta vera lokapunktinn minn á því hvaða skoðun ég hef á bólusetningum. Nenni hreinlega ekki að standa í þessu. Þú kannt að hafa aðra skoðun og það er líka bara gott og blessað.“