Stórleikarinn Pierce Brosnan hefur lýst yfir sakleysi sínu.
James Bond-leikarinn geðþekki neitar því að hafa brotið lög í Yellowstone-þjóðgarðinum í Wyoming í Bandaríkjunum þann 4. janúar en hann hefur verið ákærður fyrir að ganga inn á bannsvæði í þjóðgarðinum. Helstu sönnunargögn málsins eru myndir sem leikarinn setti sjálfur á netið.
Bannsvæðið sem hann gekk inn á er viðkvæmt hverasvæði og er þetta ekki fyrsta skipti sem hann lendir í vandræðum fyrir að labba inn á slík bannsvæði en í nóvember í fyrra var hann sektaður fyrir slíkt brot á öðrum stað í Bandaríkjunum. Ástæða bannsins er viðkvæmni svæðisins og er hverasvæðið talið mjög hættulegt. Grunur leikur á að maður hafi dottið í hver á svæðinu árið 2015 og dáið í kjölfarið.
Verði Brosnan fundinn sekur gæti hann átt von á sex mánaða fangelsisvist eða sekt upp á tæpar 700 þúsund krónur.
