Lögreglan í Grafarvogi, Mosfellsbæ og Árbæ sinnti útkalli vegna manns sem var alveg í spreng. Hann stóð í garði íbúahúss og kastaði af sér þvagi. Þegar hann hafði létt á blöðrunni sá hann sér enga aðra kosti færa en að hóta nærstöddum með hníf. Málið í rannsókn hjá lögreglu.
Farfuglarnir eru sannarlega farnir að gera vart við sig en í gær barst lögreglu tilkynning um fjóra og eða sex ferðamenn sem stóðu strand og hjálparvana við Gróttuvita. Er lögreglu bar að garði var frekari aðgerða ekki þarft þar sem ferðalangarnir reyndust fullfærir um að fljúga á braut.
Tilkynning vegna óðs manns barst lögreglu úr póstnúmeri 105. Hinn óðslegi gekk berserksgang í heimahúsi. Lögreglan mætti og handtók manninn hann var í kjölfarið vistaður í fangaklefa í þágu rannsóknar málsins.
Tvær tilkynningar bárust lögreglu vegna líkamsárása í miðborginni. Málin eru til rannsóknar.
Vökulir íbúðar í hverfi 105 tilkynntu lögreglu um tvær grunsamlegar mannaferðir. Önnur átti sér eðlilegar skýringar en í hinu tilfellinu fundust aðilarnir ekki.
Tilkynnt var um aðila sem óskaðist fjarlægður í hverfi 108. Er lögregla reyndi að ræða við viðkomandi neitaði hann að gefa upp persónuupplýsingar og sló til lögreglumanns og var því skiljanlega handtekinn. Látinn laus að lokinni skýrslutöku.