Ragnar Þór Pétursson svarar gagnrýnir Sólveigar Önnu Jónsdóttur og annarra um nýjan kjarasamning kennara, fullum fetum.
Fyrrverandi formaður Kennarasambands Íslands, Ragnar Þór Pétursson skrifaði færslu á Facebook í dag þar sem hann sendir pílur á Sólveigu Önnu Jónsdóttur, formanns Eflingar, sem hefur gagnrýnt nýsamþykktan kjarasamning kennara og segir að samningurinn ætti ekki að koma neinum á óvart. Færslan hefst á eftirfarandi hátt:
„Ekki ein manneskja (sem á annað borð les fréttir) – og svo sannarlega ekki nokkur sála sem tengist stéttarfélögum – hefur misst af því hvað kjarabarátta kennara kjarnaðist um. Kröfurnar komu ítrekað og endalaust fram. Krafan voru efndir samkomulags um jöfnun launa og leiðrétting launa í takt við samanburðarhópa. Öll, sem kynnt hafa sér málið, vita líka að ítrekaðar greiningar hafa sýnt að þar hallar mest á KÍ (þótt að sjálfsögðu séu einstakir hópar í öðrum stéttarfélögum sem eiga sambærilega kröfu).“
Segir Ragnar Þór næst, það bæði „barnalegt og kjánalegt“ fyrir fólk að stíga nú fram og „þykjast voða hissa“:
„Þess vegna er barnalegt og kjánalegt fyrir fólk að koma fram núna og þykjast voða hissa á því að kennarar hafi með átökum og samstöðu náð samningi um fyrsta skrefið (takið eftir því) í þeirri leiðréttingu. Allt tal um að þetta sé í öðrum takti en eitthvað annað er uppgerðarskilningsleysi hjá fólki sem veit miklu betur. Sparið ykkur og okkur svona sýndarmennsku.“
Ragnar Þór segist í færslunni styðja fjölmörg stéttarfélög í kjarabaráttu sinni:
„Sem kennari hef ég stutt mörg stéttarfélög í sinni kjarabaráttu. Ég styð það að laun dugi fyrir framfærslu. Ég styð það að barnafjöskyldur geti búið ungmennum þroskavænleg skilyrði. Ég fyrirlít kerfi sem koma fram við verkafólk eins og vinnudýr og stend allan daginn með því að komið verði í veg fyrir meðferð eins og þá sem hefur verið í fréttum af ræstingafólki. Réttlæti eru mínir hagsmunir hvort sem óréttlætið sem verið er að uppræta snýr að mér persónulega eða ekki.“
Að lokum beinir hann orðum sínum að Sólveigu Önnu og annarra talsmenn stéttarfélaga:
„Því segi ég þetta eitt: Talsmenn annarra stéttarfélaga. Það er neðan ykkar virðingar að láta sem þið hafið ekki vitað nákvæmlega um hvað kennarar eru búnir að vera að semja. Það er ykkur ósamboðið að styðja þær kröfur ekki. Og það kemur öllum best að átta sig á því að þetta var aðeins fyrsta skrefið í leiðréttingu okkar. Við munum fylgja þessu eftir og til þess hafa aðilar tvö ár. Að öðrum kosti heldur baráttan áfram og við munum taka hana alla leið.
Og búist nú við því.“