Karlmaðurinn sem situr í gæsluvarðhaldi grunaður um að hafa banað öðrum manni í Barðavogi þann 4. júní síðastliðinn var dæmdur fyrir ofbeldisbrot árið 2020. Mbl.is greinir frá þessu.
Auk þess að hafa hlotið dóm fyrir ofbeldisbrot var maðurinn einnig dæmdur fyrir brot á barnaverndarlögum fyrir sama atvik, fyrir að hafa veist með ofbeldi, yfirgangi og vanvirðandi háttsemi að ungum dreng.
Líkt og segir í frétt mbl.is var þetta í fyrsta sinn sem maðurinn, sem heitir Magnús Aron Magnússon, gerðist sekur um refsivert brot svo vitað sé til. Atvikið sem um ræðir átti sér stað í október árið 2019. Þá var Magnús undir lögaldri, rétt tæplega átján ára gamall, en hann er fæddur í desember árið 2001.
Greint er frá því að Magnús hafi hlotið 30 daga fangelsisdóm fyrir brotið en að dómurinn hafi verið skilorðsbundinn til tveggja ára. Dómurinn sem um ræðir var kveðinn upp þann 24. júní árið 2020. Það þýðir að þegar morðið í íbúðarhúsinu við Barðavog var framið var hann enn á skilorði.
Gert ráð fyrir áframhaldandi gæsluvarðhaldi
Einar Guðberg Jónsson, lögreglufulltrúi hjá lögreglunni á höfuðborgarsvæðinu, segist í samtali við mbl.is gera ráð fyrir því að lögregla krefjist áframhaldandi gæsluvarðhalds yfir hinum grunaða, en hann var úrskurðaður í rúmlega þriggja vikna gæsluvarðhald við handtöku á grundvelli almanna- og rannsóknarhagsmuna. Það rennur út 1. júlí.
Samkvæmt Einari er það líklegt að reynt verði að halda Magnúsi í gæsluvarðhaldi þar til málið verður dómtekið. Hann segir lögreglu vel á veg komna í rannsókninni en að beðið sé eftir ákveðnum gögnum, á borð við skýrslu frá réttarmeinafræðingi og læknagögnum.
Nágrannar höfðu áhyggjur
Magnús er talinn glíma við geðræn vandamál og hafa fréttir borist af því að nágrannar telji hann ekki eiga að búa í almennu íbúahverfi heldur sértæku úrræði. Engar upplýsingar liggja fyrir um það hvort og þá hvaða úrræða hafi verið leitað fyrir hann í heilbrigðiskerfinu.
Því hefur verið lýst að nágrannar og aðrir íbúar í Langholtshverfinu hafi lengi haft áhyggjur af ógnandi hegðun Magnúsar. Hann hefur áður ratað í fréttir fyrir ofbeldi gegn hundum í hverfinu.