Alma D. Möller heilbrigðisráðherra úthlutaði í gær 98 milljónum króna í styrki úr Lýðheilsusjóði en greint er frá þessu í tilkynningu frá stjórnarráði. Styrkir voru veittir til 153 verkefna um allt land sem öll miða að því að efla lýðheilsu.
„Að þessu sinni var áhersla lögð á að styrkja aðgerðir sem miða meðal annars að því að efla geðheilsu barna og fullorðinna og efla félagsfærni ásamt því að draga úr einmanaleika. Einnig var áhersla á áfengis-, vímu- og tóbaksvarnir, næringu, hreyfingu og kynheilbrigði. Við mat á umsóknum fyrir árið 2025 var einnig sérstaklega horft til verkefna sem styðja við minnihlutahópa, stuðla að jöfnuði til heilsu og tengjast nýsköpun á sviði forvarna og heilsueflingar.“
Foreldrahúsið fékk hæsta styrkinn en sá var fyrir „VERA heildstætt langtíma úrræði fyrir unglinga í fikti og neyslu,“ og var sá styrkur fjórar milljónir. SÁÁ fær fjórar milljónir fyrir sálfræðiþjónustu barna og svo Heilsugæsla höfuðborgarsvæðisins þrjár og hálfa milljón fyrir níkótín og tóbaks ráðgjöf.
Hægt er að sjá lista yfir alla styrkina hér.