Sala Perlunnar á lokametrunum: „Við vorum erlendis allan desember“

Sala Perlunnar er á lokastigi samkvæmt Gunnari Gunnarssyni forstjóra hennar.

Ákveðið var í fyrra af borgarráði að selja Perluna og var gefið út að lágmarksverð hennar yrði þrír og hálfur milljarður króna en borgin keypti Perluna árið 2013 af Orkuveitunni en hún var fyrst opnuð árið 1991. Hefur húsið verið eitt helsta kennileiti borgarinnar síðan þá.

Ýmsar kvaðir voru settar á söluferlið af borginni og má þar á meðal nefna forkaupsréttur borgarinnar á Perlunni og leyfa grunnskólabörnum að heimsækja safn sem rekið verður í húsinu.

Samkvæmt Gunnari forstjóra hefur söluferlið tekið þrjá mánuði en það er Perla þróunarfélag sem verður nýr eigandi Perlunnar gangi viðskiptin eftir en félagið hefur staðið fyrir sýningum í húsinu um nokkurt skeið.

„Ástæðan fyrir því að ekki náðist að ljúka við samningsdrögin er að við vorum erlendis allan desember að vinna að nýrri sýningu í Perlunni. Við munum í ár bæta við núverandi sýningar og opna einstaka upplifunarsýningu þar sem gestir upplifa virkt eldfjall og fara þaðan 2.000 metra niður í jörðina,“ sagðir Gunnar við Vísi um söluna og gaf upp að söluverðið sé rúmlega þrír og hálfur milljarður króna.