„Auðvitað er mjög erfitt að reka flugfélag þegar fáir að fljúga, eðli máls samkvæmt þá er það ekki öfundsverð staða að vera í.“ Þetta sagði Katrín Jakobsdóttir forsætisráðherra Íslands í Bítinu á Bylgjunni í morgun. Þar ræddi hún meðal annars stöðu og framtíð flugfélagsins Icelandair. „En það breytir því ekki að það er ekki eilíft ástand,“ sagði Katrín.
Aðspurð hvort að henni finnist að ríkið eigi að stíga inn í og aðstoða félagið í erfiðri stöðu sem upp er komin agði Katrín: „Ég hef ekkert útilokað þann möguleika“.
Hún bætti við að markmið okkar Íslendinga ætti að vera að hér á landi sé flugfélag með höfuðstöðvar á Íslandi. Hún segir það vera aðalatriðið, ekki endilega hver á hlut í félaginu. Katrín vill ekki að eingöngu erlend flugfélög haldi uppi flugsamgöngum hér á landi með „tilviljunarkenndum“ hætti.
Hún segir að flugrekstur sem áhættusamur en mikilvægur og nú þurfi að skoða hvaða möguleikar séu í boði. „Við þurfum að láta skynsemina ráða för,“ sagði Katrín.