- Auglýsing -
Samfélagsrýnirinn Björn Birgisson segir offramboð vera á fjölmiðlum á landinu.
Björn Birgisson samfélagsrýnirinn frá Grindavík er með munninn fyrir neðan nefið eins og sagt er. Í nýrri færslu á Facebook segir hann að offramboð sé á fjölmiðlum á landinu. Fullyrðir hann að fólk myndi ekki taka eftir því þó helmingur fjölmiðla á landinu myndi hætta starfsemi.
Hér fyrir neðan má lesa færslu Björns:
„Hlutverk fjölmiðla.
Það er eitt af því sem er stórlega ofmetið.
Fyrir það fyrsta eru þeir allt of margir í landinu, svo margir að útilokað er að þeir geti allir lifað.
En eigendum þeirra hefur tekist að blekkja ríkisvaldið til að reiða fram styrki til að létta þeim lífið.
Að halda þeim á lífi þrátt fyrir að markaðsforsendur séu fyrir löngu brostnar vegna offramboðs, skorts á áskrifendum og auglýsendum.
Ég fullyrði að þó helmingurinn af þeim fjölmiðlum sem nú eru styrktir af ríkinu hreinlega hættu starfsemi þá tæki fólk varla eftir því, framboðið væri samt yfirdrifið nóg.
Nefni sem dæmi:
Hvaða tilgangi þjónar DV í samfélaginu?
Hvaða tilgangi þjónar prentuð útgáfa Morgunblaðsins?
Hvaða vit er í að styrkja Bændablaðið?
Hvaða þjóðfélagslegur akkur er í að styrkja N4 fyrir norðan?
Margt fleira mætti að meinalausu hverfa úr fjölmiðlaflórunni.
Ef helmingurinn hverfur af markaðnum aukast lífslíkur þeirra sem eftir sitja verulega.
Það er það sem verður að raungerast.
Að ríkið sé að ausa sívaxandi upphæðum í þessa glórulausu vitleysu er alveg forkastanlegt.
Stundum finnst fólki að núverandi staða og framboð hljóti að vera hið eina rétta.
En hvernig var framboðið um aldamótin?
Hvernig var framboðið árið 1966 þegar Sjónvarpið hóf göngu sína?
Ef fjölmiðlum fækkar um helming í landinu – helst miklu meira – þá munu þeir sem eftir standa lifa góðu lífi, alla vega miklu betra lífi en nú.
Ríkisstyrkir til fjölmiðla eru af hinu vonda.
Hreinlega sóun á almannafé.“