Atli Þór Fanndal segir að uppskerubrestur á kakói ætti ekki að hafa nein áhrif á verð á íslensku súkkulaði.
Formaður Íslandsdeildar Transparency International, Atli Þór Fanndal hæðist að íslenskri matvælaframleiðslu í Facebook-færslu sem hann birti í gær. Færsluna skrifaði hann við frétt um væntanlega hækkun upp á 100 prósent á súkkulaðiverði hér á landi, vegna uppskerubrests. „Þá er nú aldeilis heppni fyrir Íslendinga að súkkulaðið okkar er fyrst og fremst flórsykurleðja með litlu sem engu kakó og mörg hundruð prósent álagningu,“ segir Atli Þór í færslunni og heldur áfram: „Súkkulaðið okkar er beinlínis bólusett gegn því að kakóverð hafi nokkur áhrif.“
Þá telur Atli Þór upp fleiri dæmi um það hversu „sniðug“ við erum hérlendis. „Við erum svo sniðug að tómatsósurnar okkar verða fyrst dýrar þegar epli hækka á mörkuðum, ostarnir þegar iðnaðsalt tekur hopp, kjötbökurnar ef laukur hækkar og súkkulaðið þegar smjör og sykur fer upp.“