Undanfarin ár þá hefur Bryndís Schram ávallt staðið með eiginmanni sínum Jóni Baldvini Hannibalssyni. Hún hefur frá upphafi neitað að trúa frásögnum kvenna um óeðlilega hegðun Jóns Baldvins. Bryndís fullyrðir á Facebook í dag að öll sú umræða sé runninn undan rifjum eins manns, Friðjóni Friðjónssyni, varaþingmanni Sjálfstæðisflokksins.
Bryndís skrifar: „Sjálfstæðismanninum með fallega nafnið, Friðjóni Friðjónssyni, hafa eflaust borist margar „ljótar sögur“ um mig og manninn minn, sem hann lýsti eftir úr sorptunnum samfélagsins (og ég minntist á í gær).Mér finnst það liggja ljóst fyrir, að aðalástæða þess, að við erum útskúfuð í dag, eru þessar sögur, sem almannatengill Sjálfstæðisflokksins auglýsti eftir á sínum tíma. Það þorir bara enginn að segja það upphátt.“
Hún fullyrðir enn fremur að allt sé þetta lygi. Hún nefnir sérstaklega að hún kannist ekki við að hafa verið áberandi full, líkt og kom fram í sumum sögum. „En ég get sagt ykkur, að allar þessar ljótu sögur um okkur Jón Baldvin eru lygaþvaður – haturspóstur sem á sér enga stoð í raunveruleikanum. Ég neyddist til þess að lesa þessar sögur á sínum tíma á síðum Stundarinnar þann 11. Janúar, 2019, og mig sundlaði við þann lestur, rétt eins og mig sundlaði undir öskrum og lygum Laufeyjar Óskar á heimili mínu sumarið áður.
Og ég þekkti ekki þetta fólk, sem verið var að lýsa. Voru þetta við Jón Baldvin? Hann káfandi læri og rassa ókunnra kvenna og ég þuklandi á kynfærum ungra karla? Alltaf sífull, flissandi drusla – í einu orði sagt viðbjóðsleg? Um leið og ég las þessar lýsingar á sjálfri mér, þá vissi ég samstundis, að sögurnar um manninn voru líka lygi,“ segir Bryndís.
Hún segist að lokum vona að dómstólar trúi henni. „Allar sögurnar um okkur, sem birtust í Stundinni 2019 voru fyrndar – nema ein. Sagan frá sumrinu áður – sem er lygi frá upphafi til enda. Það skal ég sverja við nöfn foreldra minna og dóttur, sem nú ekki lengur á meðal vor. Nú sitjum við sem sakborningar frammi fyrir dómstólum og bíðum örlaga okkar.“