Deilur eru á milli Vöku og Röskvu í stúdentapólitíkinni. Röskvuliðar stóðu upp og gengu af kjörfundi SHÍ í gær; eftir að Vaka tilkynnti að þau myndu taka forsæti í öllum fastanefndum félagsins; en nú fer Vaka með meirihluta í Stúdentaráði í fyrsta sinn í heil sjö ár.
Eða eins og segir í yfirlýsingu frá Röskvu vegna málsins:
„Röskva telur þessi vinnubrögð bæði ólýðræðisleg og ósanngjörn enda brjóta þau ekki einungis gegn lýðræðisvenju innan SHÍ heldur einnig verklagsreglum ráðsins sem samþykktar voru einróma af fulltrúum beggja hreyfinga á stúdentaráðsfundi í desember 2023.“
Segir einnig að „Röskva telur þessa framgöngu Vöku vera misbeitingu á valdi og vanvirðingu gagnvart störfum Stúdentaráðs. Hún gengur þvert gegn hagsmunum stúdenta og þeim sanngjörnu og lýðræðislegu vinnubrögðum sem Röskva hefur haft að leiðarljósi í forystu Stúdentaráðs.“
„Okkur þykir leitt að hefja starfsárið á svona ágreining en þykir verra ef þessi vinnubrögð endurspegla vinnu meirihlutans á komandi starfsári SHÍ. Við í Röskvu vonum að Vaka finni sóma sinn í að halda áfram því góða samstarfi milli fylkinga sem hefur verið við lýði á tímum Röskvu í meirihluta undanfarin ár og víki frá.“