Sigurgeir Brynjar Kristgeirsson segir að tryggingar Vinnslustöðvarinnar borgi fyrir skaðann sem varð á neyslulögninni til Vestmannaeyja sem akkeri Hugins VE 55 olli. Skipstjórinn og stýrimaður hafa samið um starfslok.
Aðspurður um ábyrgð Vinnslustöðvarinnar í málinu svaraði framkvæmdarstjórinn, Sigurgeir Brynjar Kristgeirsson, í samtali við Mannlíf: „Það er nú þannig að tryggingarfélagið okkar mun væntanlega borga fyrir þetta.“
Samkvæmt frétt Vísis var samið um starfslok skipstjóra og stýrimanns Hugins VE 55, í kjölfar slyssins en er Mannlíf ynnti hann eftir ástæðunni fyrir starfslokunum svaraði Sigurgeir Brynjar: „Ég hef bara sagt að í kjölfarið hafi verið samið um starfslok og í tengslum við það verða skipulagsbreytingar.“ Mannlíf spurði hann hvort um hafi verið að ræða mannleg mistök. „Það er bara annarra að rannsaka það. Það eru bara sjópróf og rannsóknarnefnd sjóslysa og lögreglan sem rannsakar slíkt. Við erum hvorki rannsakendur eða dómarar.“