Sjálfstæðisflokkurinn boðaði þingmenn sína til neyðarfundar í Valhöll klukkan hálf fjögur í dag og stendur fundurinn enn yfir. Bjarni Benediktsson forsætisráðherra viðurkennir að ríkisstjórnin sé „í brekku“.
„Það er bara ákall eftir því að við hittumst eins og við gerum reglulega í þingflokknum. Það vita allir að það er spenna í kringum stjórnina og þingflokkurinn vill eiga samtal, eins og við eigum alltaf,“ sagði Bjarni Benediktsson, forsætisráðherra og formaður Sjálfstæðisflokksins, við fréttamann RÚV þegar hann kom í Valhöll á þingflokksfundinn.
„Við erum að ræða veturinn fram undan, stjórnarsamstarfið og þá stöðu sem er uppi í stjórnmálunum,“ bætti hann við.
Aðspurður hvort ríkisstjórnarsamstarfið hangi á bláþræði svaraði Bjarni:
„Við erum í brekku, við verðum að viðurkenna það.“
Uppfært
Neyðarfundi Sjálfstæðisflokksins er lokið, tveimur tímum eftir að hann hófst. Samkvæmt RÚV ræddi Bjarni Benediktsson á fundinum við þingflokksfólk sitt um framtíð stjórnarsamstarfsins.
Sagði Bjarni við fréttamann RÚV að eðlilegt hafi verið að Sjálfstæðisflokkurinn kæmi saman vegna þeirra spennu sem ríkir í stjórnarsamstarfinu en segir enga sérstaka niðurstöðu hafa náðst á fundinum.
„Engin sérstök niðurstaða, engin sérstök tillaga heldur sem lá fyrir fundinum.“